મોદી-યોગીની ૮૦ મિનિટ ચર્ચા, ઉથલપાથલનાં એંધાણ

યુપીના મુખ્યમંત્રી યોગી ભાજપ અધ્યક્ષ નડ્ડાને પણ મળ્યા, મોદી સાથેની બેઠક બાદ કોઈ સત્તાવાર નિવેદન નહીં

નવી દિલ્હી, તા. ૧૧

ઉત્તર પ્રદેશમાં ચાલી રહેલા રાજકીય હલચલ વચ્ચે મુખ્યમંત્રી યોગી આદિત્યનાથે આજે દિલ્હીમાં વડા પ્રધાન નરેન્દ્ર મોદીને મળ્યા. બંને નેતાઓ વચ્ચેની આ બેઠક ૮૦ મિનિટ એટલે કે લગભગ સવા કલાક સુધી ચાલી હતી. માનવામાં આવે છે કે ઉત્તર પ્રદેશમાં આગામી વિધાનસભાની ચૂંટણી અને મંત્રીમંડળના વિસ્તરણને લઈને પીએમ મોદી અને સીએમ યોગી વચ્ચે ચર્ચા થઈ છે.

લગભગ સવા કલાક ચાલેલી વડા પ્રધાન નરેન્દ્ર મોદી સાથે યુપીના સીએમ યોગી આદિત્યનાથની મુલાકાત પૂરી થઈ છે. બેઠક પૂરી થયા બાદ બંને નેતાઓની બેઠકનો ફોટો પણ વડા પ્રધાન કાર્યાલય દ્વારા ટ્‌વીટ કરવામાં આવ્યો હતો. આ બેઠક બાદ યોગીએ ભાજપ અધ્યક્ષ જેપી નડ્ડાને પણ મળવા માટે તેમના ઘરે પહોંચ્યા હતા.

એક તરફ યુપી ભાજપમાં રાજકીય ઉથલપાથલના સમાચાર છે અને બીજી તરફ પીએમ મોદી અને સીએમ યોગીની બેઠક બાદ અટકળો શરૂ થઈ ગઈ છે. પીએમ મોદી અને સીએમ યોગી વચ્ચેની બેઠક લગભગ ૮૦ મિનિટ સુધી ચાલી. સામાન્ય રીતે કોઈ પણ મુખ્યમંત્રીને મળવા માટે વડા પ્રધાન આટલો લાંબો સમય આપતા નથી. આવી સ્થિતિમાં માનવામાં આવી રહ્યું છે કે સીએમ યોગી પહેલા કરતા વધુ મજબૂત બનીને દિલ્હીથી યુપી પાછા ફરશે.

જોકે હજી સુધી પક્ષ તરફથી કોઈ સત્તાવાર નિવેદન આવ્યું નથી, પરંતુ એવું અનુમાન કરવામાં આવી રહ્યું છે કે યુપીમાં કેબિનેટ વિસ્તરણને લઈને પીએમ મોદી અને સીએમ યોગી વચ્ચે ચર્ચા થઈ હોઈ શકે છે. આ સિવાય, એવી અટકળો પણ લગાવવામાં આવી રહી છે કે યુપીમાં વિધાનસભાની ચૂંટણી બહુ દૂર નથી. આવી સ્થિતિમાં આ અંગે પણ બંને વચ્ચે ચર્ચા થઈ હોઈ શકે.

ઉત્તર પ્રદેશના મુખ્ય પ્રધાન યોગી આદિત્યનાથે પણ પીએમ મોદીને મળ્યા બાદ આ તસવીર પોતાના ટિ્‌વટર હેન્ડલ પર શેર કરી છે. તેમણે લખ્યું - ’આજે મને નવી દિલ્હીમાં આદરણીય વડા પ્રધાન નરેન્દ્ર મોદીજીની સૌજન્ય મુલાકાત અને માર્ગદર્શન પ્રાપ્ત કરવાનો લહાવો મળ્યો છે. તમારી વ્યસ્ત દિનચર્યા વચ્ચે પણ મને વળવા માટે સમય આપવા અને આત્મીયતા સાથે માર્ગદર્શન આપવા બદલ આદરણીય વડા પ્રધાનનો હૃદયપૂર્વક આભાર’

 


લાઈક અને ફોલો કરો અમારું ફેસબુક પેજ FACEBOOK - Shri Nutan Saurashtra


સબસ્ક્રાઈબ કરો અમારી યૂ ટ્યૂબ ચેનલ YOUTUBE - Shri Nutan Saurashtra


કોરોના અંગેના મહત્વના સમાચારો આપના મોબાઇલના વોટ્સ એપમાં મેળવવા માટે જોડાઓ અમારા વોટ્સ એપ ગ્રૂપમાં.  94089 91449