મેઈન્ટેનન્સના નામે કુંદ્રાની કંપનીના ૧૩ ખાતામાં વ્યવહાર

આ રૂપિયા શેલ કંપનીઓમાં ફેરવાતા અને રાજ કુંદ્રાના પર્સનલ અકાઉન્ટમાં ટ્રાન્સફર થતા હોવાનો ખુલાસો

મુંબઈ, તા.૨૨

અશ્લીલ ફિલ્મો બનાવાના કેસમાં શિલ્પા શેટ્ટી કુંદ્રાના પતિ અને બિઝનેસમેન રાજ કુંદ્રાની ધરપકડ કરવામાં આવી છે. હવે આ કેસમાં નવું અપડેટ સામે આવ્યું છે. મીડિયા રિપોર્ટ મુજબ, ક્રાઈમ બ્રાંચના અધિકારીઓએ કરેલા સવાલ-જવાબમાં રાજ કુંદ્રાએ રોજ લાખોની લેવડદેવડ થતી હોવાનો ખુલાસો કર્યો છે.

બેંક અકાઉન્ટમાં રોજ થતી લાખોની લેવડદેવડ અંગે અધિકારીઓએ રાજને સવાલ કર્યા ત્યારે તેણે કહ્યું કે, ફેબ્રુઆરી ૨૦૧૯માં તેણે આર્મ્સ પ્રાઈમ મીડિયા લિમિટેડ નામની કંપની બનાવી હતી અને હોટશોટ્‌સ એપ ડેવલપ કરી હતી. આ એપને કેનરિંગ નામની કંપનીને ૨૫,૦૦૦ ડોલરમાં વેચી દીધી હતી. જોકે, હોટશોટ્‌સ એપના મેન્ટેન્સ માટે કેનરિન કંપનીએ રાજની વિઆન ઈન્ડસ્ટ્રીઝ સાથે ટાઈ-અપ કર્યું હતું. આ મેન્ટેન્સ માટે લાખો રૂપિયાનું ટ્રાન્ઝેક્શન વિઆન કંપનીના ૧૩ બેંક અકાઉન્ટમાં થતું હતું.

ક્રાઈમ બ્રાંચના સૂત્રોના જણાવ્યા અનુસાર, હોટશોટ્‌સ પર સબસ્ક્રાઈબર્સ દ્વારા થતી મોટી કમાણીની રકમ મેન્ટેનન્સના નામે ટ્રાન્ઝેક્શનમાં બતાવી તેમની મોડસ ઓપરેન્ડી હતી. મેન્ટેનન્સના નામે કરોડો રૂપિયાનું ટ્રાન્ઝેક્શન યુકે સ્થિત કેનરિંગ કંપની દ્વારા રાજ કુંદ્રાની કંપનીના ૧૩ બેંક અકાઉન્ટમાં થતું હતું. ત્યારબાદ આ રૂપિયા કેટલીક શેલ કંપનીઓમાં ફેરવવામાં આવતા હતા અને છેવટે રાજ કુંદ્રાના પર્સનલ અકાઉન્ટમાં ટ્રાન્સફર થતા હતા. મીડિયા રિપોર્ટ પ્રમાણે, ક્રાઈમ બ્રાંચે રાજ અને તેની કંપની વિઆન સાથે જોડાયેલા બધા જ બેંક અકાઉન્ટમાં થયેલા ટ્રાન્ઝેક્શનનું ફોરેન્સિક ઓડિટ કરવાની તૈયારી કરી લીધી છે. કેનરિંગ કંપનીના સીઈઓ પ્રદીપ બક્ષીને વોન્ટેડ જાહેર કરીને લૂક આઉટ સર્ક્‌યુલર બહાર પાડવામાં આવ્યો છે. દરમિયાન, મુંબઈ સ્થિત વિઆન ઈન્ડસ્ટ્રીઝ લિમિટેડની ઓફિસ અને અન્ય સ્થળોએ પોલીસે દરોડા પાડ્યા છે. માહિતી પ્રમાણે, ઓફિસમાંથી કેટલાક કમ્પ્યૂટરની હાર્ડ ડિસ્ક અને સર્વરને જપ્ત કરવામાં આવ્યું છે. પોલીસે અન્ય કેટલાક દસ્તાવેજો, રાજ કુંદ્રાનો આઈફોન અને લેપટોપ પણ જપ્ત કર્યા અને તપાસ માટે ફોરેન્સિક લેબમાં મોકલાયા છે.

જણાવી દઈએ કે, ૧૯ જુલાઈની રાત્રે રાજ કુંદ્રાની ધરપકડ થઈ હતી. રાજ પર અશ્લીલ ફિલ્મો બનાવાનો, એપ્સ પર પ્રસારિત કરવાનો અને વેચવાનો આરોપ છે. મુંબઈ ક્રાઈમ બ્રાંચે રાજ કુંદ્રાને આ સમગ્ર મામલાનો માસ્ટરમાઈન્ડ ગણાવ્યો છે. રાજની સાથે તેની કંપનીના આઈટી હેડ રાયન થાર્પની પણ ધરપકડ થઈ છે. બંનેને ૨૩ જુલાઈ સુધી પોલીસ રિમાન્ડ પર મોકલી આપવામાં આવ્યા છે.

 


લાઈક અને ફોલો કરો અમારું ફેસબુક પેજ FACEBOOK - Shri Nutan Saurashtra


સબસ્ક્રાઈબ કરો અમારી યૂ ટ્યૂબ ચેનલ YOUTUBE - Shri Nutan Saurashtra


કોરોના અંગેના મહત્વના સમાચારો આપના મોબાઇલના વોટ્સ એપમાં મેળવવા માટે જોડાઓ અમારા વોટ્સ એપ ગ્રૂપમાં.  94089 91449